|
Linux آپریٹنگ سسٹم کے کافی فلیورز دستیاب ہیں جن میں سےڈیسک ٹاپ کے لیے Ubuntu بہت مقبول ہے۔ لینکس اوبنٹو کے لیے تقریباً ہر قسم کے پروگرامز دستیاب ہیں مثلاً ویب براؤزر، آفس پروگرامز (ورڈ پروسیسر، سپریڈ شیٹ، پریزنٹیشن، ڈرائنگ، ڈیٹابیس)، ٹیکسٹ ایڈیٹر، گرافک ایڈیٹر، پی ڈی ایف یوٹیلیٹی، گیمز، آڈیو ایڈیٹر اور ویڈیو ایڈیٹر وغیرہ۔
|
 |
|
BleachBit لینکس آپریٹنگ سسٹم کی صفائی کے لیے ایک معروف یوٹیلٹی ہے جو سسٹم سے غیر ضروری فائلز ڈیلیٹ کر کے نہ صرف ڈسک کی خالی جگہ بڑھاتی ہے بلکہ آپریٹنگ سسٹم کی کارکردگی بھی بہتر کرتی ہے۔
|
 |
|
ویب ماسٹر اور ہیلپ ڈیسک نوعیت کے کاموں میں زیادہ ای میل اکاؤنٹس سنبھالنے کی ضرورت پڑتی ہے جس کے لیے ایک ڈیسک ٹاپ ای میل ایپلی کیشن کا استعمال ضروری ہو جاتا ہے۔ لینکس اوبنٹو پر Thunderbird Mail اس مقصد کے لیے ایک آزمودہ پروگرام ہے جس کا ایک فائدہ یہ ہے کہ ای میل اکاؤنٹ بناتے وقت یہ معروف ای میل سروسز مثلاً گوگل جی میل، مائیکرو سافٹ آؤٹ لک اور یاہو میل کے علاوہ جانی پہچانی ہوسٹنگ سروسز کے ای میل سرورز کی سیٹنگز خود ہی معلوم کر لیتا ہے۔
|
 |
|
KolourPaint لینکس آپریٹنگ سسٹم پر بنیادی قسم کی فوٹو ایڈیٹنگ کے لیے ایک معیاری سافٹ ویئر ہے جو مائیکروسافٹ ونڈوز کے Paint پروگرام سے ملتا جلتا ہے۔ کلر پینٹ نہ صرف استعمال میں آسان ہے بلکہ اس میں ایڈوبی فوٹوشاپ کی طرز کے بنیادی قسم کے ایفکٹس بھی شامل ہیں۔
|
 |
|
اوپن شاٹ ویڈیو ایڈیٹر میں وہ تمام خصوصیات موجود ہیں جو ایک معقول ویڈیو ایڈیٹر میں ہونی چاہئیں۔ مثلاً پراجیکٹ میں امیجز، آڈیوز اور ویڈیوز شامل کر کے انہیں ٹائم لائن پر استعمال کیا جا سکتا ہے، ٹائم لائن پر موجود آئٹمز کی ترتیب حسب منشا سیٹ کی جا سکتی ہے اور ان کے غیر ضروری حصے با آسانی ختم کیے جا سکتے ہیں، بہت سے ٹرانزیشن ایفیکٹس مہیا کیے گئے ہیں جن کی مدد سے ویڈیو کو پروفیشنل ٹچ دیا جا سکتا ہے، اور بالآخر تیار کردہ ویڈیو کو مختلف ویڈیو فائل فارمیٹس میں ایکسپورٹ کیا جا سکتا ہے۔
|
 |
|
لینکس اوبنٹو پر اگر آپ اسکینر کے ذریعے امیجز اسکین کر کے یا کمپیوٹر پر موجود امیجز کی مدد سے پی ڈی ایف فائل بنانا چاہیں تو اس کے لیے gscan2pdf ایک مختصر اور مفید یوٹیلٹی ہے۔ مثلاً پرانی کتابیں، دستاویزات اور رسیدیں وغیرہ پی ڈی ایف فائل کی صورت میں محفوظ کی جا سکتی ہیں۔
|
 |
|
لینکس پر ڈیٹا بیک اپ کے لیے Dropbox نے ایپلی کیشن مہیا کی ہے جو لینکس اوبنٹو کے سافٹ ویئر سنٹر سے انسٹال کی جا سکتی ہے۔ اگرچہ ڈراپ باکس کی فری اسٹوریج کی گنجائش کم ہے لیکن آپریٹنگ سسٹم کے ماحول میں اہم ڈیٹا محفوظ کرنے کے لیے یہ ایک مناسب سہولت ہے۔
|
 |
